Yəcuc və Məcuc — rəvayətə görə, Nuh peyğəmbərin oğlu Yafəsin nəslindən olan iki tayfanın adı. Ümumiyyətlə onların kimlikləri, sayları. yerləri, görünüşləri, çıxacaqları zaman mübahisəli mövzu kimi qəbul olunur.
Xristianlıq və yəhudilikdə adları Qoq və Maqoq olaraq keçir. Ehtimallara görə, Çin səddi onların hücumunun qarşısını almaq üçün çəkilmişdir. Bəzi tarixçilər bunların monqol və tatarlar olduğunu iddia edirlər.
Quranın bir neçə surəsində yəcuc və məcucdan bəhs olunur. Quranın 18-ci surəsi olan əl-Kəhf (Mağara) surəsinin 92-99-cu ayələrində Zülqərneynin cənubdan şimala doğru səfəri, dağlıq ərazidə yaşayan bir tayfanın ondan Yəcuc və Məcucu sədd ilə həbs etməsini xahiş etməsi və Zülqərneynin bunu necə etməsi nəql olunur[1]. Ənbiya surəsinin 96-cı ayəsində də yəcuc və məcucdan bəhs edilir və onlar qiyamət əlaməti kimi qəbul olunur[2]. Quran və hədislərə əsasən, Qiyamət qopmazdan əvvəl yəcuc və məcuc azad olacaq, ətrafa yayılaraq şiddətli dağıntılara səbəb olacaqlar[3].
Hədislərdə quranda olandan daha çox məlumat yer alır. Bir çox hədislərə görə, yəcuc və məcuc tayfaları səddi yıxaraq və ya orda açdıqları dəlikdən keçərək təpələrdən axışacaq, getdikləri yerləri talayacaq, Təbəriyyə gölünü içib bitirəcək və onların qorxusundan insanlar qalalara və ya müxtəlif sığınacaqlarda gizlənəcək[4]. Məcuc və Məcucun Allah tərəfindən göndəriləcək qurd (onları boyunlarından sancacaq) və ya yağış vasitəsilə məhv olacaqları rəvayət olunur.
Yəcuc və məcuc sözlərinin ərəbcə olması və ya başqa dillərdən ərəbcəyə keçməsi haqqında müxtəlif mülahizələr mövcuddur.
- ↑ https://www.qafqazislam.com - əl-Kəhf (Mağara) surəsi. İstifadə tarixi: 22 yanvar 2026.
- ↑ https://www.qafqazislam.com - əl-Ənbiya (Peyğəmbərlər) surəsi.İstifadə tarixi: 22 yanvar 2026.
- ↑ https://sorularlaislamiyet.com - YE'CÜC ve ME'CÜC. İstifadə tarixi: 22 yanvar 2026.
- ↑ https://islamansiklopedisi.org.tr - YE’CÛC ve ME’CÛC. İstifadə tarixi: 22 yanvar 2026.