Ichi the Witch,[a] Yaponiyada tanınan adı ilə Madan no Ichi[b] – Osamu Nişi tərəfindən yazılan və Şiro Usazaki tərəfindən illüstrasiya olunan manqa seriyası. 2024-cü ilin sentyabrından "Shueisha" nəşriyyatının "Weekly Shōnen Jump" jurnalında nəşr olunur. 2026-cı ilin martına qədər 7 tankobon cildi buraxılmışdır. Manqa seriyasında hadisələr sehrdən ibarət olan Macik adlı bədheybətlərin yaşadığı bir dünyada baş verir. Cadugərlər bu bədheybətlərin sınaqlarından keçərək onlardan sehr əldə edirlər. Ancaq qadınların cadugər ola biləcəyi düşünülsə də, ovçuluqla məşğul olan İçi adlı oğlan gözlənilmədən cadugər olur.
| Ichi the Witch | |
 Birinci tankobon cildinin üzlüyü. Personaj: İçi. | |
| 魔男のイチ (Madan no İçi) | |
|---|---|
| Janr | fentezi |
| Manqa | |
| Yazıçı | Osamu Nişi |
| Rəssam | Şiro Usazaki |
| Nəşriyyat | Shueisha |
| İmprint | Jump Comics |
| Jurnal | Weekly Shōnen Jump |
| Demoqrafiya | şonen |
| Nəşr tarixi | 7 sentyabr 2024 – hazırda |
| Cildlər | 7 (cild siyahısı) |
Manqada hadisələr macik adlandırılan sehrli bədheybətlərin yaşadığı dünyada baş verir. Macikləri ovlayıb onların sehrini ələ keçirən şəxslərə "cadugər" deyilir. Cadugələrin macikləri ovlaması üçün onların verdiyi sınaqlardan keçməlidirlər. Tapşırığı uğurla yerinə yetirə bilən cadugər maciki ələ keçirir və onun sehrinə sahib olur. Maciklər sadəcə onu ələ keçirən şəxs öldükdə azad ola bilər. Cadugərlərin demək olar ki, hamısı qadınlardır və kişilərin cadugər olması ehtimalı 0,001%-dən də az hesab olunur. Hekayənin əvvəlində cadugərlər tərəfindən müəyyən olunmuş 3185 və ovlanmış 402 macik var.
Balaca olanda valideynləri tərəfindən dağda tərk edilmiş İçi bir gün təsadüfən ən güclü maciklərdən biri olan Uroro ilə qarşılaşır və onun sınağından keçərək tarixdəki ilk cadugər olur. Desskarasın yönləndirməsi ilə paytaxt Natali şəhərinə səfər edir və Mantinel Cadugərlər Assosiasiyasının üzvü olur.
Manqanın hekayə müəllifi Osamu Nişi bir müsahibəsində qeyd etmişdir ki, yapon dilində "maco" (魔女?, hərf. "cadugər") sözü sadəcə qadınlar üçün işlədilir və kişi cadugərlər üçün analoji sözün olmaması ona maraqlı gəlmişdir. O, əvvəlcə cadugər olmaq arzusunda olan bir oğlan və cadugərləri qorumaq istəyən bir cəngavər haqqında manqa yazmaq istəmişdir. Lakin sehrin yaşayan varlıqlar kimi mövcud olduğu dünya haqqında hekayə yazmağın daha maraqlı olacağını düşünmüşdür.[1]
Ni.i İçinin hekayədə daha qeyri-adi bir personaj kimi görünməsi üçün onu sadəcə ovçuluqla maraqlanan oğlan kimi göstərmişdir. O, hekayəyə "final boss"la başlamağa qərar vermiş və İçinin ələ keçirdiyi ilk macikin Kral Uroro olmasına qərar vermişdir. Onun peyda olduğu ilk səhnə üçün "Haulun yeriyən qəsri" animesindən təsirlənmişdir. Uroroya tac əlavə etmək Usazakinin ideyası olmuşdur.[1]
Antidünya macikinin ilkin dizaynında o, gülümsəyən və mehriban görünüşlü oğlan kimi dizayn olunsa da, Usazaki onu gülümsəməyən, ölü gözləri olan biri kimi təsvir etməyə qərar vermişdir. Desskaras personajını yaradarkən Nişi Usazakidən sadəcə "kədərli emoji və qara saç"dan istifadə etməsini istəmiş və personajın dizaynı beş saat davam edən ilkin görüşdə tamamlanmışdır. Nişi hekayədə maciklərin nə düşmən, nə də dost kimi göstərməyə diqqət yetirmiş, əks halda, oxucuların darıxacağını düşünmüşdür.[1]
"Ichi the Witch" manqası Osamu Nişi tərəfindən yazılır və Şiro Usazaki tərəfindən illüstrasiya olunur. Manqa 9 sentyabr 2024-cü ildə "Shueisha" nəşriyyatının "Weekly Shōnen Jump" jurnalında serializasiya olunmağa başlamışdır.[2] Birinci tankobon cildi 4 yanvar 2025-ci ildə buraxılmışdır.[3] 4 mart 2026-cı ilə qədər 7 tankobon cildi buraxılmışdır.[4] Manqanın fərdi fəsilləri "ov" adlanır.
| № | Yaponca nəşr tarixi | Yaponca ISBN | ||
|---|---|---|---|---|
| 1 | 4 yanvar 2025[3] | 978-4-08-884402-2 | ||
| İçi Druid dağında yalnız böyümüş və ovçuluqla məşğul olan oğlandır. O, "ölümə ölüm" prinsipi ilə yaşayır. Dibsizlik cadugəri Desskaras ən güclü maciklərdən biri olan Uroronu ələ keçirmək üçün dağa gələndə maciki ələ keçirən şəxs İçi olur və ilk kişi cadugər olur. Desskaras onu paytaxt Natalidə yerləşən Mantinel Cadugərlər Assosiasiyasına apararkən yolda ildırım maciki olan İnazurini də ələ keçirir. Paytaxtda isə cadugər namizədi Kumuqi ilə tanış olur və ona əşya çatdırılmasında kömək edir. Analitik cadugər Şirabedonnanın sınağından uğurla keçən İçi cadugər kimi təsdiqlənir. Kumuqi isə ona nəzarət etməklə vəzifələndirilir. İçi, Desskaras və Kumuqi birlikdə macik ovlayan komanda formalaşdırırlar. Onların ilk tapşırığı Cauz kəndində buz maciki olan Uruvaşini ələ keçirmək olur. | ||||
| 2 | 4 mart 2025 | 978-4-08-884417-6 | ||
| İçi buz maciki Uruvaşi ilə qarşılaşır. Uruvaşi onu ələ keçirmək üçün tələb olunan sınağın onu dəbdəbəli göstərmək olduğunu açıqlayır. Desskaras və Kumuqi uğursuz olduqdan sonra İçi Minakata adlı balıqçıdan öyrəndiyi texnikalardan istifadə edərək Uruvaşinin bədənini hissələrə bölür və onu saşimiyə çevririr. Beləliklə, İçi onu ələ keçirir və kəndliləri azad edir. Parlaq cadugər Maneqold İçini müzakirə etmək üçün cadugərlər yığıncağı təşkil edir və İçini dünyaya açıqlamağı təklif edir. Lakin Gümüş qar cadugəri Çikutoqe Toqeays buna qarşı çıxır, onun təhsilə ehtiyac olduğunu deyir. Məsələni həll etmək üçün macik ovlama yarışı təşkil olunur: İçi və Toqeaysdan kim birinci macik ələ keçirsə, onun istəyi baş tutacaq. Onlar bu yarışı Hoytaka meşəsində göbələk maciki olan Masilveyni ələ keçirmək barəsində təşkil edirlər. Onu ələ keçirmək üçün tələb olunan sınaq on yaxalayıb kökünü kəsməkdir. İçi Kumuqinin köməyi ilə ona qarşı tələ qurur, lakin onu yaxalamaq üzrə ikən hədəfini dəyişdirir. Belə ki, bu zaman ağsaçlı insan cildində olan təhlükəli macik Antidünya maciki ortaya çıxır. İçi ilə Antidünya maciki arasında döyüş başlayır. | ||||
| 3 | 4 iyun 2025 | 978-4-08-884580-7 | ||
| İçi buz sehrindən istifadə edərək Antidünya macikinin irəliləyişini kəsir və huşunu itirir. Desskaras və Toqeays Antidünya maciki ilə döyüşür və onu geri çəkilməyə məcbur edir. İçi oyananda Peyğəmbər cadugəri ona deyir ki, Antidünya maciki bütün dünyanı məhv edəcək və onu dayandıra biləcək yeganə şəxs ancaq İçi ola bilər, lakin İçi öləcək. Buna baxmayaraq, İçi bundan qorxmur. Desskaras İçini 15 il öncə ölmüş qardaşı Libro ilə müqayis edir. Məsuliyyət hiss edən Desskaras İçi ilə qan müqaviləsi bağlayır və onun "ailəsi" olur. Qan müqaviləsinə görə əgər İçi ölərsə, Desskaras da öləcək. Desskarasın komandası Bakuqamiyə səyahət edərək Oqiqumo macikini ələ keçirmək istəyir. Lakin macikə işgəncə verən, təhlükəli bir şəxs olan Zalım Qokuraku ilə qarşılaşırlar. Qokuraku və İçi dostlaşırlar, Qokuraku kişi cadugər olmağın yollarını soruşur. Uroro Qokurakunu manipulyasiya etməyə çalışır, lakin Qokuraku ona aldanmır. Desskaras və Kumuqi Peyğəmbər cadugərin proqnozunda adı çəkilən yuxulayan maciki axtarırlar, nəhayət həmin macikin Bakuqami ölkəsinin sevimli maciki olduğunu kəşf edirlər. Qokuraku Bakuqaminin parazit olduğunu və onu ələ keçirmək üçün İçinin köməyini istəyir. | ||||
| 4 | 4 avqust 2025 | 978-4-08-884611-8 | ||
| On il öncə Qokurakunun böyük bacısı, Kaqami şahzadəsi Riçiya insanların kədərini götürən Bakuqamini kəşf edir və səfalət içərisində olan ölkəni turistik məkana çevirir. Hətta ölkənin adı Kaqamidən Bakuqamiyə dəyişdirilir. Lakin əslində Bakuqami insanların kədərini yığan və onları sahiblərinə qaytararaq intihar etmələrinə səbəb olan təhlükəli macikdir. Qokuraku macikin bu xüsusiyyətini kəşf edir, lakin saraydan sürgün edilir. Qokuraku bir gün Bakuqamini məğlub etməyə və bacısının emosiyalarını qaytarmağa and içir. İndiki zamanda Qokuraku və İçi macikə hücum edirlər və bütün xalq onların dalınca düşür. Qokuraku gizlicə bacısı Riçiyanı ziyarət edir. Riçiya onun İçi ilə dostlaşmasına sevinir, eyni zamanda Bakuqaminin gəlişinin 10 illiyinə hazırlaşdığını bildirir. İçi insanların fikrini yayındırarkən Desskaras gizlicə Bakuqamini təftiş edir və onun gizli planını ifşa edir: o, Antidünya macikinə xoş gəlmək üçün 10 illik kədəri bütün xalqa qaytarmaq niyyətindədir. Bakuqamini ələ keçirmək üçün tələb olunan sınaqda Bakuqaminin yığdığı 10 illik kədərə təkbaşına dözmək lazımdır. Bakuqami bütün kədəri Qokurakuya yükləyir və onu İçiyə zəncirləyir. Ağlını itirmiş Qokuraku ilə İçi arasında döyüş başlayır. İçi Ariadnanın sehrindən istifadə edərək Qokurakunun hərəkətini məhdudlaşdırır. | ||||
| 5 | 3 oktyabr 2025 | 978-4-08-884695-8 | ||
| Bakuqami ilə döyüşən Qokuraku kabuslarla üzləşir, anasının ölümünü unutduğu üçün intihar edən Riçiyanın kabusunu görür. Lakin İçinin ailənin mənası haqqında sualını xatırlayıb dözməyə davam edir. Belə ki, Qokuraku bu suala ailəni dayaq rolunda çıxış edən paya kimi cavab verir. Qokuraku sınaqdan keçmək üzrəykən Bakuqami daha çox kədər toplamaq üçün Kaqami xalqını axtarır, lakin cadugərlərin müdaxiləsi ilə onlar təhlükəsiz yerə götürülür. Bakuqami Riçiyanın kədərini çəkmək istəsə də, Riçiya onu rədd edir. Qokuraku sınağı tamamlayır və İçi maciki ələ keçirir. Nəticədə, Kaqami xalqının uzun müddət möhürlü qalmış duyğuları özlərinə qayıdır. Riçiyanın anası üçün sadə yas mərasimi keçirilir və Riçiya yeni kraliça elan olunur. O, krallığı çiçəkləndirmək üçün and içir. İçi Qokurakunu onlara qoşulmağa dəvət edir. Qokuraku bu təklifi əvvəlcə rədd edir, bacısına krallıqda kömək etmək istəyir. Lakin Riçiya artıq krallığın məsuliyyətini Qokurakuya yükləmək istəmədiyini bildirir və Qokuraku Desskaras komandasına qoşulmağa razı olur. Cadugərlər assosiasiyasına gələn Qokuraku cinayətlərini etiraf edir və üzr istəyir. Maneqold onu Desskaras komandasının xüsusi köməkçisi vəzifəsinə təyin edir. Assosiasiya İçi üçün şənlik təşkil etməyə qərar verir. Kumuqi dəvət olunanlar arasında bacısı Spika Harvestin adını görür. | ||||
| 6 | 4 dekabr 2025 | 978-4-08-884865-5 | ||
| Toqeaysın tapşırığı ilə İçi qazandığı pulu xərcləməyə çalışır və o, Kumuqinin tövsiyəsi ilə Desskarasa hədiyyə kimi ulduzlu konfetlər alır. İçinin tanıtım şənliyi baş tutur. Tədbirə gələnlər arasında olan Kumuqinin bacısı Spika nüfuzunu artırmaq üçün İçiyə yaxınlaşmaq istəyir və Desskaras komandasında Kumuqini əvəzləməyi təklif edir. Kumuqi öz uşaqlığını xatırlayır, səbəb olduğu qəza nəticəsində Spikanın bir gözünü itirməsini və bu səbəbdən Spikanın uzun illər ondan istifadə etməsini yada salır. Kumuqi bacısına qarşı gələrək Desskaras komandasında qalmaqda israr edir və İçi Spikanı rədd edir. Cikişirone cadugərlər yığıncağında yeni vəhy almadığını bildirir. Həmin gecə Antidünya macikinin onu öldürməsi barədə vəhy alır. Onun yanına gizlicə soxulan və Antidünya macikinin elçisi olan Hitsuqi Cikişironeyə onlara qatılmasını təklif edir. Hitsuqi uzaqlaşarkən Desskarasla qarşılaşır və aralarında döyüş baş tutur. Hitsuqi qaçarkən cadugərlərin macikləri ələ keçirdiyi dövrün başa çatacağını bildirir. Desskaras komandası yeni tapşırığa yollanır. Onlar Sarğac dənizindəki bir kabus gəmidə yaşayan əfsanəvi macik olan zamanı bükən maciki ələ keçirməklə vəzifələndirilirlər. Onlar zaman maciki ilə qarşılaşanda şoka düşürlər: onun hamilə olan insan arvadı ilə qarşılaşırlar. | ||||
| 7 | 4 mart 2026 | 978-4-08-884874-7 | ||
| İçi Zaman bükən macikin pis niyyətli macik olmadığını biləndə onu ələ keçirməkdən imtina edir. Cikişirone Minervanın uşağının ölməli olduğunu dediyi üçün Minerva ona şillə vurur. Bu zaman okean cərəyanlarını idarə edən və bir çox dənizçini öldürmüş macik Kizaşi gəlir. Onu ələ keçirmək üçün tələb olunan sınaq onu öldürməkdir. O, Zamanı bükən maciklə oynamağı sevir, lakin uşağını öldürməyə çalışır, çünki uşağın onu zəiflətdiyini düşünür. İçi Kizaşini məğlub etməyə çalışır, lakin alınmır. İçi Uroro ilə müqavilə bağlayır və bədəninin qısa müddətlik ələ keçirilməsinə razı olur. Uroro gücləndirilmiş İnazuri hücumu ilə Kizaşinin bədənini parçalayır və vaxt qazanır. Minervada üzr istəyən Cikişirone Kizaşinin qayıtması ilə bağlı dəhşətli vəhy alır. Özünə gələn Kizaşi Hitsuqi ilə birlikdə hücum edir, bu zaman Qokurakunun başçılıq etdiyi qrup Minervanı uzaqlaşdırmağa çalışır. Ölmüş dənizçiləri dirildən Hitsuqi ilə Zamanı bükən macik döyüşməyə başlayır. Hitsuqinin əmri ilə Kizaşi Minervanın dalınca düşür. Hitsuqi Desskarasa onu ələ keçirmək üçün tələb olunan sınağın onun üçün 10.000 ölüm təqdim etmək olduğunu açıqlayır. | ||||
Aşağıdakı fəsillər "Weekly Shōnen Jump" jurnalında nəşr olunsa da, tankobon cildi formatında nəşr olunmayıb.
- "Parçalanmış ürək" (引き裂かれた心, Hikisakareta Kokoro?)
- "Təhdid" (脅威, Kyoi?)
- "Vəd" (約束, Yakusoku?)
- "Libro" (リブロ, Riburo?)
- "Beş saniyəlik əlaqə" (繋げる5秒, Tsunaqeru Qo-byo?)
- "Həmin 1 saniyə" (その一秒が, Sono İçi-byo qa?)
- "Qabarma və çəkilmə" (寄せては返す, Yosete va Kaesu?)
- "İşıq ulduzu" (光星, Kosey?)
- "Sonuncu yuxu" (最後の夢, Sayqo no Yume?)
- "Bir neçə saniyə daha" (あと数秒, Ato Subyo?)
- "Sadəcə bir anlığına belə olsa" (一瞬でも長く, İşşun Demo Naqaku?)
- "Ulduz düşür" (星堕ちる, Hoşi Oçiru?)
- "Evə qayıdaq" (戻もどろう, Modoro?)
"My Hero Academy" manqasının müəllifi Kohey Horikoşi və "D.Gray-man" manqasının müəllifi Katsura Hoşino manqa seriyasını tövsiyə etmişdirlər.[5][6]
Manqa seriyası 2025-ci ildə Next Manqa Mükafatının qalibi olmuşdur.[7] 2026-cı ildə Manqa Tayşo Mükafatına namizəd göstərilmişdir.[8]
- 1 2 3 "「なぜ魔男という言葉がないんだろう？」西修さん×宇佐崎しろさんが語る「魔男のイチ」誕生秘話". Yomiuri (yaponca). 7 mart 2026. 7 mart 2026 tarixində arxivləşdirilib. İstifadə tarixi: 11 mart 2026.
- ↑ "act-age Artist Shiro Usazaki, Iruma-kun's Osamu Nishi Launch New Manga". Anime News Network (ingiliscə). 1 sentyabr 2024. İstifadə tarixi: 7 mart 2026.
- 1 2 "魔男のイチ 1". Shueisha (yaponca). İstifadə tarixi: 7 mart 2026.
- ↑ "魔男のイチ 7". Shueisha (yaponca). İstifadə tarixi: 7 mart 2026.
- ↑ "西修×宇佐崎しろが描く「魔男のイチ」1巻、堀越耕平が絶賛「少年漫画の理想です」". Comic Natalie (yaponca). 2 yanvar 2025. 12 noyabr 2025 tarixində arxivləşdirilib. İstifadə tarixi: 17 mart 2026.
- ↑ "魔男のイチ：「D.Gray-man」星野桂が震撼！ 「私は何を目撃させられてるんだ……？」 西修×宇佐崎しろ「ジャンプ」話題作". Mantan Web (yaponca). 2 iyun 2025. 12 iyun 2025 tarixində arxivləşdirilib. İstifadə tarixi: 17 mart 2026.
- ↑ "次にくるマンガ大賞 2025」1位に「魔男のイチ」「サンキューピッチ」". Comic Natalie (yaponca). 18 sentyabr 2025. İstifadə tarixi: 17 mart 2026.
- ↑ "マンガ大賞2026」ノミネート12作品を発表". Comic Natalie (yaponca). 2 mart 2026. 2 mart 2026 tarixində arxivləşdirilib. İstifadə tarixi: 17 mart 2026.
- shonenjump.com/j/rensai/madannoichi.html — "Weekly Shōnen Jump"da manqanın rəsmi saytı