Sabir Abdin

1962-ci il, yanvar ayının 16-da Bakı şəhərində anadan olmuşdur. 1979-cu ildə Yardımlı rayonunda orta məktəbi, 1988-ci ildə S.M.Kirov adına Azərbaycan Dövlət Universitetinin (BDU) hüquq fakultəsini bitirmişdir. İxtisasca hüquqşünasdır. Uzun illər prokurorluq orqanlarında işləmişdir. Yardımlı rayon prokurorunun köməkçisi, Kürdəmir rayon prokurorunun köməkçisi və böyük köməkçisi, Sabirabad rayon prokurorunun köməkçisi, Baş prokurorluqda idarə prokuroru, Mingəçevir şəhər prokurorunun müavini, Fizuli rayon prokuroru, Baş Prokurorluğun Müraciətlərə baxılması idarəsinin prokuroru, Baş Prokurorluğun Dövlət ittihamının müdafiəsi üzrə idarəsinin Ağır cinayətlər məhkəmələrində Dövlət ittihamının müdafiəsi üzrə şöbəsinin prokuroru və Baş Prokurorluğun Daxili işlər orqanlarının istintaq, təhqiqat və əməliyyat-axtarış fəaliyyətində qanunların icrasına nəzarət idarəsinin böyük prokuroru vəzifələrində çalışmışdır. Baş ədliyyə müşaviridir. 17 yanvar 2022-ci ildən son yaş həddi ilə əlaqədar prokurorluq orqanlarında qulluq keçməyinə xitam verilməklə təqaüdə göndərilmişdir. Prokurorluq orqanlarında xidməti vəzifələrinin yerinə yetirilməsində göstərdiyi xidmətlərə görə Azərbaycan Respublikası Prezidentinin 27 sentyabr 2008-ci il tarixli sərancamı ilə “Dövlət qulluğunda fərqlənməyə görə” medalı ilə təltif edilmiş və digər mükafatlara layiq görülmüşdür.

Hazırda Azərbaycan Respublikasının Vəkillər Kollegiyasının üzvü olmaqla vəkillik fəaliyyəti ilə məşğuldur. Həm də “Respublika Pediatriya Mərkəzi” PHŞ-də hüquqşünas vəzifəsində çalışır.

O, uzun illərdir ki, bədii yaradıcılıqla məşğuldur. İlk şeiri 1978-ci ildə Yardımlı rayonunda çıxan “Yeni kənd” qəzetində dərc edilmişdir. Müxtəlif illərdə şeirləri müntəzəm olaraq “Azərbaycan”, “Ulduz”, “Mütərcim”, “Kür-Araz”, “Mingəçevir leysanı”, “Söz” jurnallarında, “Ədəbiyyat və incəsənət”, “Ədəbiyyat naminə”, “525-ci qəzet”, “Ədalət”, “Yeni Azərbaycan”, “Kredo”, “Kaspi”, “İnam” və digər qazetlərdə, habelə “Dağların söz xəzinəsi” (“Açıq dünya” nəşriyyatı, 2007-ci il), “Poeziya günü” (“Poeziya günü” nəşrlər evi, 2010-cu il), “Qayalardan süzülən söz” (“UniPrint” nəşriyyatı, 2013-cü il) almanaxlarında dərc edilmişdir.

“Demə, mənə, heç nə demə” (“Bilik” Maarifçilik cəmiyyətinin “Bayatı” nəşriyyatı, 1997-ci il), “Qınamasın bu yurd məni” (“Bilik” Maarifçilik cəmiyyətinin “Bayatı” nəşriyyatı, 1998-ci il), “Mənə dəniz verin” (“Azərbaycan Milli Ensiklopediyası” nəşriyyatı, 2002-ci il), “Sənə məktublarım” (“Açıq dünya” nəşriyyatı, 2007-ci il), “Sizsiz, sizinlə…” (“Vektor” beynəlxalq elm mərkəzi, 2010-cu il) və “Adını sən seç...” (“Yazıçı” nəşriyyatı, 2016-cı il) şeirlər kitablarının müəllifidir. Görkəmli ədəbiyyatşünas alimlərin, yazıçı və şairlərin məqalələrindən ibarət onun yaradıcılığına həsr olunmuş “Romantik düşüncələr poeziyası” (toplu) kitabı 2017-ci ildə “Yazıçı” nəşriyyatında işıq üzü görmüşdür. Tanınmış bəstəkarlar Cavanşir Quliyev, Nadir Əzimov, Vüqar Camalzadə, Vüsal Qurbanov, Əli Baxış, Rauf Məmmədov, Sahil Əliyev və başqaları tərəfindən 100-dən çox şeirinə mahnılar bəstələnmişdir. 2001-ci ildə bəstəkar Nadir Əzimov tərəfindən şeirlərinə yazılmış nəğmələrdən ibarət “Dünyadan böyük sevgimiz” adlı audio kaset və disk böyük tirajla müsiqisevərlərin ixtiyarına verilmişdir. Onun sözlərinə yazılmış “ Mənə dəniz verin”, “Yağış istədim”, “Bağışla” (ifaçı Eyyub Yaqubov), “Gəlmədin” (ifaçı Qədir Qızılsəs), “Xəbərin yox” (ifaçı Zülfiyyə Xanbabayeva), “Bilirəm, getmisən” (ifaçı Zaur Rzayev), “Yarpaq yağışı” (ifaçı İlhamə Quliyeva), “Bir gün” (ifaçı Mətanət İsgəndərli), “Bu gecə” (ifaçı Rüfət Mehdiyev), “Yuxum” (ifaçı Azərin), “Bəlkə də” (ifaçı Oktay Ağayev), “Mingəçevir” (ifaçı Briliyant Dadaşova), “Bu axşam” (ifaçı Emin Nəsirli) və digər mahnılar dillər əzbəridir.

Azərbaycan Yazıçılar Birliyinin və Azərbaycan Jurnalistlər Birliyinin üzvüdür. “Qızıl Qələm” media mükafatı laureatıdır. Ailəlidir, üç övlad atasıdır. 4 nəvəsi var.

Əsərləri:
1.“Demə mənə, heç nə demə” (“Bilik” Maarifçilik cəmiyyətinin “Bayatı” nəşriyyatı, 1997-ci il, 47 səhifə, 500 nüsxə);
2. “Qınamasın bu yurd məni” (“Bilik” Maarifçilik cəmiyyətinin “Bayatı” nəşriyyatı, 1998-ci il, 128 səhifə, 1000 nüsxə);
3.“Mənə dəniz verin” (“Azərbaycan Milli Ensiklopediyası” nəşriyyatı, 2002-ci il, 99 səhifə, 1000 nüsxə);
4.“Sənə məktublarım” (“Açıq dünya” nəşriyyatı, 2007-ci il, 111 səhifə, 500 nüsxə);
5.“Sizsiz, sizinlə…” (“Vektor” beynəlxalq elm mərkəzi, 2010-cu il, 23 səhifə, 500 nüsxə);
6.“Adını sən seç...” (“Yazıçı” nəşriyyatı, 2016-cı il, 110 səhifə, 500 nüsxə);

Yaradıçılığı haqqında yazılan kitablar:
1. “Romantik düşüncələr poeziyası” (toplu) kitabı, (“Yazıçı” nəşriyyatı, 2017-ci il, 200 səhifə, 500 nüsxə).

• Tapdıq Əlibəyli. "Üzümü söykəyib göyün üzünə", "Poetik buta" (kitab), Bakı, 2013, səh.81–87.
• AMEA Nizami adına Ədəbiyyat İnstitutunun şöbə müdiri, filologiya elmlər doktoru, professor Asif Rüstəmli. "Romantik düşüncələr poetikası" 2015
• Azərbaycan Yazıçılar Birliyi və Azərbaycan Jurnalistlər Birliyinin üzvü, Rəşad Bəydəmirli. "Pəncərəsinə yağan yağışla ovunan şair"
• Fəlsəfə dokroru, Sabir Bəşirov "SƏNƏ MƏKTUBLARIM" KİTABI HAQQINDA DÜŞÜNCƏLƏR
• Əbülfət Mədətoğlu " UZAT ƏLLƏRİNİ Qoy səndən başlasın ömrün nağılı "
• Tənqidçi, filologiya elmləri namizədi. Rüstəm Kamal " GÖYLƏRDƏN ENƏN İŞIQ: SƏS VƏ SÖZ "